സന്ദേശ്ഖാലിയിലെ ആക്രമണങ്ങളിൽ സർക്കാർ എന്ത് നടപടി സ്വീകരിച്ചു ? ആവർത്തിക്കപ്പെട്ടാൽ ഇരകളായവർക്ക് രാജ്ഭവൻ അഭയം നൽകും ! മമത ബാനർജിക്കെതിരെ തുറന്നടിച്ച് ഗവർണർ സിവി ആനന്ദ ബോസ്

കൊൽക്കത്ത: തെരഞ്ഞെടുപ്പിന് ശേഷം പശ്ചിമ ബംഗാളിൽ നടക്കുന്ന ആക്രമണ സംഭവങ്ങളിൽ ആശങ്കാകുലനാണെന്ന് ഗവർണർ സിവി ആനന്ദ ബോസ്. ആക്രമണങ്ങൾ തടയാൻ കർശന നടപടികൾ സ്വീകരിക്കണമെന്ന് ആവശ്യപ്പെട്ട് അദ്ദേഹം മുഖ്യമന്ത്രി മമത ബാനർജിക്ക് കത്തെഴുതിയിരിക്കുകയാണ്. നോർത്ത് 24 പർഗാനയിലെയും സന്ദേശ്ഖലിയിലെയും സ്ഥിതിഗതികൾ രൂക്ഷമായി തുടരുകയാണെന്നും അദ്ദേഹം വ്യക്തമാക്കി.

തെരഞ്ഞെടുപ്പ് നടന്നതിന് ശേഷം സന്ദേശ്ഖലിയിലും നോർത്ത് 24 പർഗാനയിലും ആക്രമണങ്ങൾ നടക്കുകയാണ്. സ്ത്രീകൾക്കും കുട്ടികൾക്കും പരിക്കേൽക്കുന്നുണ്ട്. സന്ദേശ്ഖലിയിലെ ജനജീവിതത്തെ കുറിച്ച് ആശങ്കാകുലനാണെന്ന് ഗവർണർ സിവി ആനന്ദ ബോസ് പറയുന്നു. ആക്രമണങ്ങളിൽ എന്ത് നടപടിയാണ് മമത സർക്കാർ സ്വീകരിച്ചുവെന്നറിയാൻ മുഖ്യമന്ത്രിക്ക് കത്ത് എഴുതിയിട്ടുണ്ടെന്നും ആക്രമണങ്ങളിൽ ഉൾപ്പെട്ടവർക്കെതിരെ കർശന നടപടികൾ സ്വീകരിക്കുമെന്നും സിവി ആനന്ദ ബോസ് വ്യക്തമാക്കി. അതേസമയം, വരും ദിവസങ്ങളിൽ ഇത്തരം ആക്രമണങ്ങൾ തുടർന്നാൽ രാജ്ഭവന്റെ വാതിലുകൾ ഇരകളായവർക്ക് മുന്നിൽ തുറക്കപ്പെടുന്നതായിരിക്കും. സാധാരണക്കാരെ രാജ്ഭവനിൽ സുരക്ഷിതമായ സ്ഥലത്ത് പാർപ്പിക്കുമെന്നും ആനന്ദ ബോസ് കൂട്ടിച്ചേർത്തു.

തെരഞ്ഞെടുപ്പ് നടന്ന് 24 മണിക്കൂറിനുള്ളിലാണ് സന്ദേശ്ഖലിയിലും നോർത്ത് 24 പർഗാനയിലും ആക്രമണങ്ങൾ പൊട്ടിപ്പുറപ്പെട്ടത്. തൃണമൂൽ കോൺഗ്രസിന്റെ ഗുണ്ടകളാണ് ആക്രമണത്തിന് പിന്നിലെന്നാണ് ജനങ്ങൾ ആരോപിക്കുന്നത്. ആക്രമണത്തിൽ ബിജെപി നേതാവ് ഹാഫിസുൽ ഷെയ്ഖിനെ അക്രമി സംഘം വെടിവച്ചു കൊന്ന ശേഷം തലയര്ത്തിരുന്നു. തൃണമൂൽ കോൺഗ്രസ് പ്രവർത്തകർ അയച്ച അക്രമികളാണ് 35 കാരനായ ഹാഫിസുലിനെ കൊലപ്പെടുത്തിയതെന്ന് കുടുംബം ആരോപിച്ചു. സംഭവത്തിൽ കുടുംബം സിബിഐ അന്വേഷണം ആവശ്യപ്പെടുകയും ചെയ്തിട്ടുണ്ട്.