കസാഖിസ്ഥാനിൽ കലാപം തുടരുന്നു; പ്രതിഷേധക്കാരെ കണ്ടാലുടൻ വെടിവെക്കാൻ ഉത്തരവ്; സംഘർഷം രൂക്ഷം

ഇന്ധനവില വർധനവിനെതിരെ പ്രതിഷേധം രൂക്ഷമായ (Kazakhstan) കസാഖിസ്ഥാനിൽ പ്രതിഷേധക്കാരെ നേരിടാൻ കർശന നടപടികളുമായി സർക്കാർ. പ്രതിഷേധം നടത്തുന്നവര്‍ക്കെതിരെ മുന്നറിയിപ്പില്ലാതെ വെടിവെക്കാന്‍ കസാഖിസ്ഥാന്‍ സര്‍ക്കാര്‍ ഉത്തരവിട്ടു. പ്രതിഷേധം രൂക്ഷമായ സാഹചര്യത്തില്‍ പ്രസിഡന്റ് ഖാസിം ജോമാര്‍ട്ട് ടൊകായേവാണ് ഉത്തരവിട്ടത്.

സുരക്ഷാ സേനക്കാണ് വെടിയുതിര്‍ക്കാന്‍ പ്രസിഡന്റ് അനുമതി നല്‍കിയത്. റഷ്യന്‍ സേന എത്തിയതിന് ശേഷവും അല്‍മാട്ടിയടക്കമുള്ള നഗരങ്ങളില്‍ പ്രതിഷേധം തുടരുകയും മറ്റിടങ്ങളില്‍ പ്രതിഷേധങ്ങള്‍ ആരംഭിക്കുകയും ചെയ്തതോടെയാണ് പ്രസിഡന്റ് വിവാദ ഉത്തരവ് പുറപ്പെടുവിച്ചത്. ഒരാഴ്ചയായി തുടരുന്ന സംഘർഷത്തിൽ നിരവധി പൊലീസുകാരും സാധാരണ പൗരൻമാരും കൊല്ലപ്പെട്ടിട്ടുണ്ട്.

സ്വാതന്ത്ര്യത്തിന് ശേഷം കസാഖിസ്ഥാൻ കണ്ട ഏറ്റവും രൂക്ഷമായ സംഘർഷമാണ് ഇപ്പോൾ നടക്കുന്നത്. കഴിഞ്ഞ ആഴ്ച 26 സായുധരായ അക്രമികളെ വധിച്ചതായും 3,000 പേരെ കസ്റ്റഡിയിലെടുത്തതായും ആഭ്യന്തരവകുപ്പ് അറിയിച്ചു. ഒരാഴ്ചയായി തുടരുന്ന പ്രതിഷേധങ്ങളുടെ ഭാഗമായി ആയിരക്കണക്കിന് പൊലീസുകാരും പ്രതിഷേധക്കാരും കൊല്ലപ്പെട്ടതായാണ് വിവരം. ആയിരത്തിലധികം ആളുകള്‍ക്ക് പരുക്ക് പറ്റിയിട്ടുണ്ടെന്ന് കസാഖിസ്ഥാന്‍ ആരോഗ്യമന്ത്രാലയം അറിയിച്ചു.