ദുല്ഖര് സല്മാൻ നായകനാക്കി റോഷന് ആന്ഡ്രൂസ് സംവിധാനം ചെയ്യുന്ന ചിത്രം ഇതിനോടകം വലിയ ചർച്ചകൾക്കാണ് ഇടയാക്കിയത്. ബോബി- സഞ്ജയ് ആണ് തിരക്കഥ എന്നതും ചിത്രത്തെ ശ്രദ്ധേയമാക്കുന്നു. വലിയ പ്രേക്ഷക സ്വീകാര്യത നേടിയ ‘മുംബൈ പൊലീസി’നു ശേഷം റോഷന് ആന്ഡ്രൂസ് സംവിധാനം ചെയ്യുന്ന പൊലീസ് സ്റ്റോറിയാണ് സല്യൂട്ട്. മാത്രമല്ല റോഷന് ആന്ഡ്രൂസ് ചിത്രത്തില് ദുല്ഖര് ആദ്യമായാണ് അഭിനയിക്കുന്നത്.
കഴിഞ്ഞ ദിവസം പുറത്തെത്തിയ ചിത്രത്തിന്റെ ട്രെയ്ലറിനു യുട്യൂബില് വന് പ്രതികരണമാണ് ലഭിച്ചത്. ഒരു ദിവസം കൊണ്ട് 15 ലക്ഷത്തോളം കാഴ്ചകള് ലഭിച്ച ട്രെയ്ലര് ട്രെന്ഡിംഗ് ലിസ്റ്റിലും ഒന്നാമതാണ്. ട്രെയ്ലർ വന്നതിനു പിന്നാലെ ദുല്ഖറിന്റെ പൊലീസ് വേഷത്തെ ട്രോളുകളിലൂടെ ആഘോഷിക്കുകയാണ് ആരാധകര്.
![salute dulquer salmaan police character got positive trolls by fans rosshan andrrews](https://static-ai.asianetnews.com/images/01fqrzmpm5ddwyf57mjze1xg16/befunky-collage--4-.jpg)
മലയാളം, തമിഴ് സിനിമകളിലെ പ്രശസ്ത പൊലീസ് കഥാപാത്രങ്ങള് ദുല്ഖര് അവതരിപ്പിക്കുന്ന ‘അരവിന്ദ് കരുണാകരന് ഐപിഎസി’നെ സല്യൂട്ട് ചെയ്യുന്ന രീതിയിലാണ് ട്രോളുകള്. സൂര്യയുടെയും വിജയ്യുടെയും ബിജു മേനോന്റെയും മമ്മൂട്ടിയുടെ തന്നെ കഥാപാത്രങ്ങളും ഇക്കൂട്ടത്തിലുണ്ട്.
![salute dulquer salmaan police character got positive trolls by fans rosshan andrrews](https://static-ai.asianetnews.com/images/01fqrznfnh5gk3rjr2evytaepr/befunky-collage--5-.jpg)
ഇന്വെസ്റ്റിഗേറ്റീവ് ത്രില്ലര് ഗണത്തില് വരുന്ന പൊലീസ് സ്റ്റോറിയാണ് ചിത്രം. അരവിന്ദ് കരുണാകരന് ഐപിഎസ് എന്ന പൊലീസ് ഓഫീസറായാണ് ദുല്ഖര് സ്ക്രീനിലെത്തുന്നത്. ഒരു സാധാരണ പൊലീസ് സ്റ്റോറി ആയിരിക്കില്ല ചിത്രമെന്ന സൂചന തരുന്നതാണ് പുറത്തെത്തിയിരിക്കുന്ന ട്രെയ്ലർ. ബോളിവുഡ് താരവും മോഡലുമായ ഡയാന പെന്റിയാണ് നായിക.
![salute dulquer salmaan police character got positive trolls by fans rosshan andrrews](https://static-ai.asianetnews.com/images/01fqrzr7v34c1agz6fnrhp0zce/befunky-collage--7-_710x400xt.jpg)
ചിത്രത്തിൽ മനോജ് കെ ജയൻ മറ്റൊരു സുപ്രധാന വേഷത്തില് എത്തുന്നു. അലൻസിയർ, ബിനു പപ്പു, വിജയകുമാർ, ലക്ഷ്മി ഗോപാലസ്വാമി, സാനിയ ഇയ്യപ്പൻ തുടങ്ങിയവരാണ് മറ്റു പ്രധാന താരങ്ങള്. ജേക്സ് ബിജോയ്യുടേതാണ് സംഗീതം. എഡിറ്റിംഗ് ശ്രീകർ പ്രസാദ്, ഛായാഗ്രഹണം അസ്ലം പുരയിൽ, മേക്കപ്പ് സജി കൊരട്ടി, വസ്ത്രാലങ്കാരം സുജിത് സുധാകരൻ, കലാസംവിധാനം സിറിൽ കുരുവിള, സ്റ്റിൽസ് രോഹിത്, പ്രൊഡക്ഷൻ കൺട്രോളർ സിദ്ധു പനയ്ക്കൽ, ചീഫ് അസോസിയേറ്റ് ഡയറക്ടർ കെ സി രവി, അസോസിയേറ്റ് ഡയറക്ടർ ദിനേഷ് മേനോൻ, പിആർഒ മഞ്ജു ഗോപിനാഥ്. വേഫെയറര് ഫിലിംസിന്റെ ബാനറില് ദുല്ഖര് സല്മാന് തന്നെയാണ് നിര്മ്മാണം. വേഫെയറര് നിര്മ്മിക്കുന്ന അഞ്ചാമത്തെ ചിത്രമാണിത്. 2022 ജനുവരി 14ന് തിയറ്ററുകളിലെത്തും.