റെയ്‌സി ഭീകരാക്രമണം !രജൗരിയിലെ അഞ്ചിടങ്ങളിൽ എൻഐഎ പരിശോധന ; ഭീകരരുമായി ബന്ധപ്പെട്ട നിരവധി വസ്തുക്കൾ പിടിച്ചെടുത്തുവെന്ന് സൂചന

ശ്രീനഗര്‍ : ജമ്മുകശ്മീരിലെ രജൗരി ജില്ലയിലെ അഞ്ചിടങ്ങളിൽ പരിശോധന നടത്തി ദേശീയ അന്വേഷണ ഏജന്‍സി. ജൂൺ ഒമ്പതിന് നടന്ന റെയ്‌സി ഭീകരാക്രമണവുമായി ബന്ധപ്പെട്ടാണ് പരിശോധന. പരിശോധനയില്‍ ഭീകരരുമായി ബന്ധപ്പെട്ട പല വസ്തുക്കളും പിടിച്ചെടുത്തുവെന്നാണ് വിവരം.ഭീകരാക്രമണ ഗൂഢാലോചനയേക്കുറിച്ചുള്ള കൂടുതല്‍ വിവരങ്ങള്‍ക്കുവേണ്ടി ഇവ പരിശോധിച്ചു വരികയാണ്. മേഖലയില്‍ നിന്ന് ആക്രമണം നടത്തിയ ഭീകരർക്ക് സഹായം നല്‍കിയിരുന്ന ഹകാം ഖാന്‍ എന്നയാളെ ഇക്കഴിഞ്ഞ 19-ന് ജമ്മുകശ്മിര്‍ പോലീസ് അറസ്റ്റ് ചെയ്തിരുന്നു. ഭീകരർക്ക് സുരക്ഷിതയിടവും ഭക്ഷണം ഉള്‍പ്പെടെയുള്ളവയും ഹകാം സൗകര്യപ്പെടുത്തി നൽകിയിരുന്നുവെന്നാണ് വിവരം.

ജൂണ്‍ ഒന്‍പതിന് കത്രയിലേക്ക് പുറപ്പെട്ട തീർത്ഥാടകരുടെ ബസിന് നേര്‍ക്ക് ഭീകരർ വെടിയുതിര്‍ത്തതിനെത്തുടർന്ന് കൊക്കയിലേക്ക് മറിഞ്ഞുണ്ടായ അപകടത്തില്‍ ഒന്‍പതുപേര്‍ മരിക്കുകയും നിരവധി പേര്‍ക്ക് പരിക്കേല്‍ക്കുകയും ചെയ്തിരുന്നു. ഉത്തര്‍ പ്രദേശ്, ദില്ലി , രാജസ്ഥാന്‍ എന്നിവിടങ്ങളില്‍നിന്നുള്ളവരായിരുന്നു തീർത്ഥാടകർ. ശിവ് ഖോരി ക്ഷേത്ര സന്ദര്‍ശനത്തിനു ശേഷമുള്ള മടക്കയാത്രയിലായിരുന്നു തീർത്ഥാടക സംഘം.