”പാകിസ്ഥാൻ കരിമ്പട്ടികയിൽ തന്നെ”; വിജയം കണ്ടത് ഇന്ത്യയുടെ തന്ത്രപരമായ നീക്കം; ഗ്രേ ലിസ്റ്റിൽ നിന്നും പിൻവലിക്കണമെന്ന പാകിസ്ഥാന്റെ അപേക്ഷ തള്ളി എഫ്.എ.ടി.എഫ്

ദില്ലി: പാകിസ്ഥാന് കനത്ത തിരിച്ചടി (Pakistan). ഭീകരവാദ പ്രവർത്തനങ്ങൾ പൂർണ്ണമായും നിയന്ത്രിക്കാനാകാത്ത സാഹചര്യത്തിൽ പാകിസ്ഥാനെ ഗ്രേ ലിസ്റ്റിൽ തന്നെ നിലനിർത്തുമെന്ന് ഫിനാൻഷ്യൽ ആക്ഷൻ ടാസ്‌ക് ഫോഴ്സ് (എഫ്എടിഎഫ്). വിജയിച്ചത് ഇന്ത്യ അടക്കമുള്ള രാജ്യങ്ങളുടെ സമ്മർദമാണെന്നാണ് റിപ്പോർട്ട്.
പാകിസ്ഥാൻ സ്വീകരിച്ച നടപടികൾ കരിമ്പട്ടികയിൽ നിന്നും ഒഴിവാക്കാൻ പാകത്തിലുള്ളതല്ലെന്ന് എഫ്എടിഎഫ് പ്രസിഡന്റ് മാർക്കസ് പ്ലെയർ വ്യക്തമാക്കി. മൂന്ന് ദിവസ്സത്തെ എഫ്.എ.ടി.എഫിന്റെ യോഗമാണ് ഗ്രേലിസ്റ്റിൽ നിന്നും മാറ്റണം എന്ന പാകിസ്ഥാന്റെ അപേക്ഷ അംഗികരിക്കേണ്ടെന്ന തീരുമാനം കൈക്കൊണ്ടത്.

എന്നാൽ ചൈന, തുർക്കി, മലേഷ്യ എന്നീ രാജ്യങ്ങൾ പാകിസ്ഥാനെ പിന്തുണച്ചെങ്കിലും മറ്റെല്ലാ അംഗ രാജ്യങ്ങളും എതിർ നിലപാടാണ് സ്വീകരിച്ചത്. രാജ്യത്തെ ഭീകരവാദികൾക്കും സംഘടനകൾക്കുമെതിരെ ഉചിത നടപടികൾ സ്വീകരിച്ചെന്ന പാകിസ്ഥാന്റെ നിലപാടും യോഗം പൂർണ്ണമായും തള്ളി. യോഗത്തിലുടനീളം ഹാഫിസ് സയ്യദ്, മസൂദ് അസർ തുടങ്ങിയ ഭീകരവാദികളെ വെള്ളപൂശാനായിരുന്നു പാകിസ്ഥാൻ ശ്രമിച്ചത്. ഇത് പാകിസ്ഥാന് തിരിച്ചടിയായി. ഐക്യരാഷ്ട്ര സഭ ഭീകരവാദികളായി പ്രഖ്യാപിച്ച ഹാഫിസ് സയ്യദ്, മസൂദ് അസർ തുടങ്ങിയവർക്കെതിരെ പാകിസ്ഥാൻ സ്വീകരിച്ച നടപടികൾ ഫലപ്രദമല്ലെന്ന് യോഗം വിലയിരുത്തി.

ഇതുവരെ പാകിസ്ഥാൻ സ്വീകരിച്ച നടപടികൾ ഗ്രേലിസ്റ്റിൽ നിന്നും ഒഴിവാക്കാൻ പാകത്തിലുള്ളതല്ലെന്ന് എഫ്എടിഎഫ് പ്രസിഡന്റ് മാർക്കസ് പ്ലെയർ വ്യക്തമാക്കി. 27 ഇന നിർദേശങ്ങളായിരുന്നു പാകിസ്ഥാന് എഫ്.എ.ടി.എഫ് ഒക്ടോബറിൽ നൽകിയത്. അതേസമയം കനത്ത നിരാശ ഉണ്ടാക്കുന്നതാണ് തീരുമാനമെന്ന് പാകിസ്ഥാൻ പ്രതികരിച്ചു. നിർദേശങ്ങൾ നടപ്പാക്കാൻ രാജ്യം കാട്ടിയ ആത്മാർത്ഥത എഫ്.എ.ടി.എഫ് പരിഗണിച്ചില്ല എന്നാണ് പാകിസ്ഥാൻറെ വാദം.

2022 ഏപ്രിലിലാണ് ഇനി എഫ്.എ.ടി.എഫ് യോഗം ചേരുക. സാമ്പത്തിക പ്രതിസന്ധി രൂക്ഷമായ പാകിസ്ഥാൻ ഐഎംഎഫ്, ലോക ബാങ്ക്, ഏഷ്യൻ ഡെവലപ്‌മെന്റ് ബാങ്ക്, യൂറോപ്യൻ യൂണിയൻ, തുടങ്ങിയ ഏജൻസികളിൽ നിന്ന് സാമ്പത്തിക സഹായം കരസ്ഥമാക്കാൻ ശ്രമം നടത്തിവരികയായിരുന്നു. എഫ്.എ.ടി.എഫ് തിരുമാനത്തോടെ ഇത് തടസപ്പെട്ടു. ഇതോടെ പാകിസ്ഥാൻ കൂടുതൽ പ്രതിസന്ധിയിലായിരിക്കുകയാണ്.