പഞ്ചാബിൽ പ്രധാനമന്ത്രിയെ തടയുന്നവർക്ക് 10 ലക്ഷം രൂപ സമ്മാനം പ്രഖ്യാപിച്ച സിഖ് ഫോർ ജസ്റ്റിസ് തലവനെതിരെ ന്യൂയോർക്ക് പോലീസ് മേധാവിക്ക് പരാതി

പഞ്ചാബിൽ പ്രധാനമന്ത്രിയുടെ തെരഞ്ഞെടുപ്പു റാലികൾ തടയുന്നവർക്ക് പത്തുലക്ഷം രൂപയുടെ ഇനാം പ്രഖ്യാപിച്ച ഭീകര സംഘടനയായ സിഖ് ഫോർ ജസ്റ്റിസ് എന്ന സംഘടനയുടെ തലവൻ ഗുരുപത്വന്ത്‌ സിംഗ് പന്നുവിനെതിരെ അമേരിക്കയിലെ ന്യൂയോർക്ക് പോലീസ് മേധാവിക്ക് പരാതി. ദില്ലി അഭിഭാഷകനായ വിനീത് ജിൻഡാളാണ് പരാതി നൽകിയത്. പ്രധാനമന്ത്രിയെ തടയാനും റിപ്പബ്ലിക് ദിനാഘോഷങ്ങൾ തടസപ്പെടുത്താനും ആഹ്വാനം ചെയ്യുന്ന വീഡിയോ സിഖ് ഫോർ ജസ്റ്റിസ് സമൂഹ മാധ്യമങ്ങളിലൂടെ ആഹ്വാനം ചെയ്തിരുന്നു. കലാപത്തിന് ആഹ്വാനം നൽകുക, ക്രിമിനൽ ഗൂഡാലോചന നടത്തുക, ഇന്ത്യക്കെതിരെ യുദ്ധം പ്രഖ്യാപിക്കുക, പ്രധാനമന്ത്രിക്കും സുപ്രീം കോടതി ജഡ്ജിമാർക്കും എതിരെ വധഭീഷണി മുഴക്കുക എന്നീ വകുപ്പുകളിലാണ് പരാതി നൽകിയിരിക്കുന്നത്.

ഖാലിസ്ഥാനീ ഭീകര സംഘടനയായ സിഖ് ഫോർ ജസ്റ്റിസ് പ്രധാനമന്ത്രിയെ തടയാനും റിപ്പബ്ലിക് ദിനത്തിൽ ദില്ലിയിൽ ദേശീയപതാക മാറ്റാനും കലാപകാരികൾക്ക് ആഹ്വാനം നൽകുകയും വൻ തുക ഇനാം പ്രഖ്യാപിക്കുകയും ചെയ്തിരുന്നു. വൻ സുരക്ഷാ വീഴ്ച സൃഷ്ടിച്ചുകൊണ്ട് പ്രധാനമന്ത്രിയുടെ വാഹന വ്യൂഹം വഴിയിൽ തടഞ്ഞതിന്റെ ഉത്തരവാദിത്തം സംഘടന ഏറ്റെടുത്തതായും പരാതിയിൽ പറയുന്നു. പഞ്ചാബിന്റെ സ്വാതന്ത്ര്യത്തിന് വേണ്ടി വാദിക്കുന്ന ഭീകര ഗ്രൂപ്പായ സിഖ് ഫോർ ജസ്റ്റിസ് അമേരിക്കയിൽ നിന്നാണ് പ്രവർത്തിക്കുന്നത്.