കണ്ണൂരിൽ തൊണ്ണൂറ്റിമൂന്ന് വയസ്സുള്ള അമ്മയ്ക്ക് ക്രൂരമർദനം; മക്കൾ നാലുപേരും ചേർന്ന് അമ്മയുടെ കൈ പിടിച്ച് തിരിച്ചു, കാലിൽ ചവിട്ടി

കണ്ണൂ‍‍ർ: കണ്ണൂരിൽ തൊണ്ണൂറ്റിമൂന്ന് വയസ്സുള്ള അമ്മയ്ക്ക് മക്കളുടെ ക്രൂരമർദനം (Mother Brutally Attacked In Kannur). മാതമംഗലത്ത് ആണ് സംഭവം. സ്വത്തിന് വേണ്ടി മക്കൾ അമ്മയെ ക്രൂരമായി മർദിക്കുകയായിരുന്നുവെന്നാണ് വിവരം. പത്ത് മക്കളുള്ള മീനാക്ഷിയമ്മയുടെ മൂന്ന് മക്കൾ നേരത്തെ മരിച്ചു. മരിച്ച ഓമനയുടെ സ്വത്ത് മറ്റ് മക്കൾക്ക് വീതിച്ച് തരണമെന്ന് പറഞ്ഞായിരുന്നു മർദനം. സംഭവത്തിൽ മീനാക്ഷിയമ്മയുടെ മക്കളായ രവീന്ദ്രൻ, അമ്മിണി, സൗദാമിനി, പത്മിനി എന്നിവരുടെ പേരിൽ പെരിങ്ങോം പൊലീസ് കേസെടുത്തു.

അതേസമയം മർദനത്തിൽ മീനാക്ഷിയമ്മയ്ക്ക് കൈക്കും കാലിനും നെഞ്ചിനും പരിക്കേറ്റു. തൊണ്ണൂറ്റിമൂന്ന് വയസ്സുള്ള അമ്മയെക്കൊണ്ട് ബലം പ്രയോഗിച്ച് സ്വത്ത് കൈക്കലാക്കാൻ ശ്രമിച്ചത് സ്വന്തം മക്കൾ തന്നെയായിരുന്നു. എന്നാൽ മുറ്റത്ത് കളിച്ച് കൊണ്ടിരുന്ന കുട്ടികളാണ് ഈ അക്രമത്തിന്റെ സംഭാഷണം ഫോണിൽ റെക്കോ‍‍ർഡ് ചെയ്തത്. മക്കൾ നാലുപേരും ചേർന്ന് അമ്മയുടെ കൈ പിടിച്ച് തിരിച്ചു. കാലിൽ ചവിട്ടി പിടിച്ചു. ശേഷം നെഞ്ചിന് പിടിച്ച് അമ്മയെ തള്ളിമാറ്റി. എന്നിട്ടും ഒപ്പിടാതിരുന്ന അമ്മയെ അസഭ്യ വർഷം നടത്തി ബലമായി കൈ പിടിച്ച് ഒപ്പിടുവിക്കുകയുമായിരുന്നു എന്നാണ് പോലീസ് കണ്ടെത്തൽ.