തീയേറ്ററുകൾ തുറക്കുമെന്ന വാർത്ത എത്തിയത്തിന് പിന്നാലെ ആദ്യമായി വന്ന അപ്ഡേറ്റുകളില്‍ ഒന്നായിരുന്നു വിനീത് ശ്രീനിവാസന്‍ സംവിധാനം ചെയ്യുന്ന ഹൃദയത്തിന്റേത്. കഴിഞ്ഞ ദിവസം രാവിലെയാണ് വീഡിയോ ഗാനത്തിന്റെ റിലീസ് ഡേറ്റ് പ്രഖ്യാപിച്ചുകൊണ്ട് ചിത്രത്തിന്റെ പുതിയ പോസ്റ്റര്‍ ഇറങ്ങിയത്. ചിത്രത്തിലെ നായക കഥാപാത്രത്തെ അവതരിപ്പിക്കുന്ന പ്രണവ് മോഹന്‍ലാല്‍ ആള്‍ക്കൂട്ടത്തിനിടയില്‍ ചുവട് വയ്ക്കുന്ന ചിത്രമായിരുന്നു പോസ്റ്ററില്‍.
വിനീത് ശ്രീനിവാസൻ സമൂഹ മാധ്യമത്തിലൂടെ പോസ്റ്റർ പങ്കുവെച്ചതിന് പിന്നാലെ പ്രണവിനെ കാണാൻ പണ്ടത്തെ ലാലേട്ടനെ പോലെയുണ്ടെന്ന് നിരവധി കമന്റുകളാണ് വരുന്നത്. എന്നാൽ തൊട്ട് പിന്നാലെ മോഹന്‍ലാല്‍ ആരാധകരുടെ പേജുകള്‍ നിറയെ പ്രണവിന് പകരം മോഹന്‍ലാലിന്റെ മുഖം ചേര്‍ത്ത ഹൃദയത്തിന്റെ പോസ്റ്ററാണ്. ചിത്രം ഇപ്പോൾ സമൂഹ മാധ്യമങ്ങളിൽ വൈറലാകുകയാണ്. “മോളിവുഡ് എഡിറ്റേഴ്സ് ഗ്യാലറി” എന്ന ഫെയ്സ്ബുക്ക് ഗ്രൂപ്പിലാണ് ചിത്രം ആദ്യമായി പ്രത്യക്ഷപ്പെട്ടത്. ലിജില്‍ ലിജു കുന്നോത്തെന്ന കലാകാരനാണ് സൃഷ്ടിക്ക് പിന്നില്‍.
അതേസമയം ഷൂട്ടിങ് പൂർത്തിയായ ഹൃദയത്തിന്റെ റിലീസ് തീയതി ഇതുവരെ പ്രഖ്യാപിച്ചിട്ടില്ല. ചിത്രം ഒടിടി പ്ലാറ്റ്‌ഫോമിലൂടെ എത്തുമോയെന്ന ആരാധകരുടെ ആശങ്ക വിനീത് തന്നെ അവസാനിപ്പിച്ചിരുന്നു. “ഹൃദയം ഒടിടി റിലീസ് ആയിരിക്കില്ല. അതിനാലാണ് ഇത്രയും നാള്‍ കാത്തിരുന്നത്. തിയേറ്ററില്‍ തന്നെയായിരിക്കും റിലീസ് എന്ന് ഉറപ്പ് നല്‍കുന്നു,” ചിത്രത്തിന്റെ റിലീസ് സംബന്ധിച്ച് ഫെയ്സ്ബുക്ക് പോസ്റ്റിന് താഴെ വന്ന കമന്റിന് വിനീത് മറുപടി നല്‍കിയിരുന്നു. പ്രണവ് മോഹന്‍ലാലിന് പുറമെ കല്യാണി പ്രിയദര്‍ശന്‍, ദര്‍ശന രാജേന്ദ്രന്‍ എന്നിവരാണ് ഹൃദയത്തില്‍ മറ്റ് രണ്ട് പ്രധാന കഥാപാത്രങ്ങളെ അവതരിപ്പിക്കുന്നത്
