കുട്ടികള്‍ ചീത്തയാകുന്നത് രക്ഷിതാക്കള്‍ ഫോണില്‍ സമയം ചെലവഴിക്കുന്നതിനാല്‍’; ഹൈദരാബാദ് കൂട്ടബലാത്സംഗത്തില്‍ തെലങ്കാന ആഭ്യന്തര മന്ത്രി

ഹൈദരാബാദ്: ഹൈദരാബാദില്‍ പ്രായപൂര്‍ത്തിയാകാത്ത പെണ്‍ക്കുട്ടി കൂട്ടബലാല്‍സംഗത്തിനിരയായ സംഭവത്തില്‍ രക്ഷിതാക്കളെ കുറ്റപ്പെടുത്തി തെലങ്കാന ആഭ്യന്തരമന്ത്രിയുടെ വിവാദപരാമര്‍ശം. രക്ഷിതാക്കള്‍ കൂടുതല്‍ സമയവും മൊബൈല്‍ ഫോണില്‍ ചെലവഴിക്കുന്നതുകൊണ്ടാണ് കുട്ടികള്‍ ചീത്തയാകുന്നതെന്നാണ് കൂട്ടബലാല്‍സംഗം സംബന്ധിച്ച്‌ തെലങ്കാന ആഭ്യന്തരമന്ത്രി മുഹമൂദ് അലി അഭിപ്രായപ്പെട്ടത്. കേസില്‍ പ്രതിചേര്‍ക്കപ്പെട്ടവരില്‍ പ്രായപൂര്‍ത്തിയാകാത്തവരും ഉള്‍പ്പെടുന്നുണ്ട്.

കുട്ടികളെ സംരക്ഷിക്കേണ്ടത് രക്ഷിതാക്കളുടെ ഉത്തരവാദിത്വമാണ്. എല്ലാ രക്ഷിതാക്കളോടും തങ്ങളുടെ കുഞ്ഞുങ്ങളെ വേണ്ടരീതിയില്‍ ശ്രദ്ധിക്കണമെന്നും സംസ്ഥാന ആഭ്യന്തരമന്ത്രി മുഹമ്മൂദ് അലി അഭ്യര്‍ഥിക്കുകയും ചെയ്തു. കുട്ടികള്‍ തോന്നിതുപോലെ അലഞ്ഞു നടന്നാല്‍ അവരെ നിയന്ത്രിക്കാന്‍ പ്രയാസമാകുമെന്നും മന്ത്രി കൂട്ടിച്ചേര്‍ത്തു.
മെയ് 28നാണ് ഹൈദരാബാദിലെ ജൂബിലി ഹില്‍സില്‍ പതിനേഴുകാരിയായ പെണ്‍ക്കുട്ടി കൂട്ടബലാല്‍സംഗത്തിന് ഇരയായത്. ഭരണകക്ഷി എംഎല്‍എയുടെ മകനുള്‍പ്പെട്ട കൂട്ടബലാല്‍സംഗത്തില്‍ കേസില്‍ അറസ്റ്റിലായ ആറുപേരില്‍ നാലുപേര്‍ പ്രായപൂര്‍ത്തിയാകാത്തവരാണ്.