ആറന്മുള ക്ഷേത്രത്തിലെ ദുർനിമിത്തങ്ങൾ; ദേവപ്രശ്‌നം നടത്താൻ തന്ത്രിയുടെ അഭിപ്രായം തേടി ദേവസ്വം ബോർഡ്

ആറന്മുള: പാർഥസാരഥി ക്ഷേത്രത്തിലെ ദുർനിമിത്തങ്ങൾ ദേവപ്രശ്‌നം നടത്തണമെന്ന ഭക്തരുടെ ആവശ്യത്തെ തുടർന്ന് ദേവസ്വം ബോർഡ് തന്ത്രിയുടെ അഭിപ്രായം തേടി കത്തു നൽകി. ക്ഷേത്ര തന്ത്രി കുഴിക്കാട്ടില്ലം അഗ്നിശർമൻ വാസുദേവൻ ഭട്ടതിരിപ്പാടിനോടാണ് ആറന്മുള ദേവസ്വം അസി. കമ്മിഷണർ ഉപദേശം തേടിയത്. ഇടശ്ശേരിമല 234-ാം നമ്പർ എൻഎസ്എസ് കരയോഗവും ചില വ്യക്തികളും ഇക്കാര്യത്തിൽ പരിഹാര നടപടികൾ വേണമെന്ന് ആവശ്യപ്പെട്ടിരുന്നു.

ക്ഷേത്രത്തിൽ അടുത്ത കാലത്തുണ്ടായ ചില ദുർനിമിത്തങ്ങൾക്ക് കാരണം തേടി ദേവപ്രശ്‌നം നടത്തി പരിഹാര നടപടികൾ ഉണ്ടാകണമെന്നാണ് ആവശ്യപ്പെട്ടിരിക്കുന്നത്. വള്ളസദ്യ ആരംഭിക്കുന്ന ജൂലൈ 21ന് മുൻപ് പരിഹാര ക്രിയകൾ ചെയ്യണമെന്നാണ് ഭക്തരുടെ ആവശ്യം. ബന്ധപ്പെട്ടവരുമായി കൂടിയാലോചിച്ച ശേഷം മറുപടി അറിയിക്കുമെന്ന് തന്ത്രി പറഞ്ഞു.