ഗവർണർക്ക് 85 ലക്ഷത്തിന്റെ പുതിയ ബെൻസ്; നിർദ്ദേശം അംഗീകരിച്ച് സർക്കാർ; ഉത്തരവ് പുറത്തിറങ്ങി

തിരുവനന്തപുരം: ഗവർണർ ആരിഫ് മുഹമ്മദ് ഖാന് പുതിയ കാർ വാങ്ങണമെന്ന നിർദ്ദേശം അംഗീകരിച്ച് സർക്കാർ. സർക്കാർ പുറത്തിറക്കിയ ഉത്തരവ് പ്രകാരം 85.18 ലക്ഷം രൂപ വിലവരുന്ന ബെൻസ് ജിഎൽ‌ഇ വാങ്ങാനാണ് തീരുവമാനം.

ഗവർണർക്ക് പുതിയ കാർ വാങ്ങണമെന്ന് സർക്കാർ നേരത്തെ തീരുമാനം എടുത്തിരുന്നു. പുതിയ ബെൻസ് കാർ ആവശ്യപ്പെട്ട് ഗവർണർ സർക്കാരിന് കത്തുനൽകിയെന്ന വാർത്ത കുറച്ചുദിവസം മുമ്പ് വലിയ ചർച്ചകൾക്ക് വഴിവച്ചിരുന്നു. എന്നാൽ യാത്ര ചെയ്യാൻ പുതിയ ബെൻസ് കാർ വേണമെന്ന് സര്‍ക്കാരിനോട് ആവശ്യപ്പെട്ടിട്ടില്ലെന്ന് ഗവർണ്ണർ ആരീഫ് മുഹമ്മദ് ഖാൻ വ്യക്തമാക്കിയിരുന്നു. ഇതിന് പിന്നാലെയാണ് ഇന്ന് ഉത്തരവിറങ്ങിയിരിക്കുന്നത്.

ചുരുക്കം ചില യാത്രകളിലൊഴികെ ഒരു വര്‍ഷമായി ഉപയോഗിക്കുന്നത് ഭാര്യക്ക് അനുവദിച്ച വാഹനമാണ്. 85 ലക്ഷം രൂപയുടെ ബെൻസ് കാർ ആവശ്യപ്പെട്ട് രണ്ട് വർഷം മുമ്പ് ഗവർണർ കത്തുനൽകിയിരുന്നു. എന്നാൽ ഗവർണറുടെ ആവശ്യം ധനവകുപ്പ് അംഗീകരിച്ചെങ്കിലും അന്തിമ തീരുമാനം എടുത്തിരുന്നില്ല. നിലവിൽ ഗവർണർ ഉപയോഗിക്കുന്ന ബെൻസിന് 12 വർഷത്തെ പഴക്കമുണ്ട്. ഈ ഒന്നരലക്ഷം കിലോമീ‌റ്റർ ഓടിയ കാർ മാ‌റ്റണമെന്നാണ് ഗവർണർ നിർദ്ദേശിച്ചത്.

ഇതേതുടർന്ന് മെക്കാനിക്കൽ എഞ്ചിനീയർ പരിശോധന നടത്തി വാഹനം മാറ്റണം എന്നാവശ്യപ്പെട്ടിരുന്നു. വിഐപി പ്രോട്ടോക്കോൾ പ്രകാരം ഒരു ലക്ഷം കിലോമീറ്റർ ഓടിയാൽ വാഹനം മാറ്റാം. ഗവർണറുടെ വാഹനം നിലവിൽ ഒന്നരലക്ഷം കിലോമീറ്റർ ഓടിയിട്ടുണ്ട്.