തിരുവനന്തപുരം : ഇന്ന് ലോക വാര്‍ത്താവിനിമയ ദിനം.ലോകമെമ്പാടും വാര്‍ത്താ വിനിമയ രംഗത്ത് അവിശ്വസനീയമായ കുതിച്ചു ചാട്ടമാണ് ഉണ്ടായിരിക്കുന്നത്. ലോകം ആഗോള ഗ്രാമമായി ചുരുങ്ങിയിട്ടുണ്ടെങ്കില്‍ അതിന്റെ പ്രധാന കാരണം വാര്‍ത്താ വിനിമയ രംഗത്തുള്ള വിസ്‌ഫോടനമാണെന്ന് നിസംശയം പറയാം. അതിന്റെ ഒടുവിലത്തെ നേട്ടമാണ് ഇന്റര്‍നെറ്റ്. 20 വര്‍ഷത്തെ ചെറിയ കാലംകൊണ്ട് ഇന്റര്‍നെറ്റ് ലോകം മുഴുവന്‍ പൊതിയുന്ന വാര്‍ത്താ വിനിമയ ശൃംഖലയായി മാറി കഴിഞ്ഞു. ഇന്ത്യയിലും വാര്‍ത്താ വിനിമയ രംഗത്ത് വന്‍ കുതിച്ചു ചാട്ടമാണ് ഉണ്ടായിരിക്കുന്നത്. ലോകത്തെ നേട്ടങ്ങളുമായി തട്ടിച്ചുനോക്കിയാല്‍ ഒപ്പത്തിനൊപ്പം നില്‍ക്കുന്ന സ്ഥിതിയാണ് ഇന്ത്യയുടേത്.
അന്തര്‍ദേശീയ വാര്‍ത്താവിനിമയ യൂണിയന്‍ (ഐ.ടി.യു) തുടങ്ങിയ ദിവസമാണ് വാര്‍ത്താ വിനിമയ ദിനമായി ആചരിക്കുന്നത്. 1865ലാണ് യൂണിയന്‍ സ്ഥാപിതമാകുന്നത്. ലോക്ക്ഡൗണ്‍ തുടരുന്ന ലോകം, ചുറ്റുപാടുമെന്തെന്നറിയാന്‍ ആകാംക്ഷാകുലരാകുന്ന കാലത്ത് ഈ ദിനത്തിന് പ്രസക്തിയേറെയാണ്.
രാജ്യത്തെ മുഴുവന്‍ ടെലിഫോണ്‍ എക്‌സ്‌ചേഞ്ചുകളും സ്വയം പ്രവര്‍ത്തിക്കുന്നവയാക്കി ബി.എസ്.എന്‍.എല്‍ മാറ്റിക്കൊണ്ടിരിക്കുകയാണ്. കേരളത്തില്‍ എല്ലാ എക്‌സ്‌ചേഞ്ചുകളും ഓട്ടോമാറ്റിക് ആക്കി കഴിഞ്ഞു. കേരളത്തില്‍ നൂറു പേര്‍ക്ക് 13.6 എന്ന ക്രമത്തില്‍ ടെലി ഡെന്‍സിറ്റിയുണ്ട്. 1218 ഡിജിറ്റല്‍ ടെലിഫോണ്‍ എക്‌സ്‌ചേഞ്ചുകളുണ്ട്.
8 ലക്ഷത്തോളം മൊബൈല്‍ ഫോണുണ്ട്. ഇതിന് പുറമേയാണ് സ്വകാര്യ കമ്പനികളുടെ തേരോട്ടം.റിലയന്‍സ്, ടാറ്റാ ഇന്‍ഡികോം, വൊഡാഫോണ്‍,ഐഡിയ, എയര്‍ ടെല്‍, ഹച്ച്, ബി.പി.എല്‍ തുടങ്ങി ഒട്ടേറെ കമ്പനികള്‍ ഇന്ത്യയിലെ വാര്‍ത്താ വിനിമയ രംഗത്തുണ്ട്. വിവര സാങ്കേതിക രംഗത്തും ഇന്ത്യ അത്ഭുതങ്ങള്‍ കൈവരിച്ചിരിക്കുകയാണ്.
