ഒരുക്കങ്ങൾ പൂർത്തിയായി; പുതുവത്സരം ആഘോഷമാക്കാൻ ഒരുങ്ങി ദുബായ് എക്‌സ്‌പോ

ദുബായ്: ഇത്തവണ പുതുവത്സരം ആഘോഷമാക്കാൻ ഒരുങ്ങി ദുബായ് എക്‌സ്‌പോ. കരിമരുന്ന് പ്രയോഗവും രാജ്യാന്തര കലാകാരന്മാർ പങ്കെടുക്കുന്ന വൈവിധ്യമാർന്ന പരിപാടികളും പുതുവത്സരാഘോഷത്തിന്റെ ഭാഗമായി എക്‌സ്‌പോ വേദിയിൽ ഒരുക്കിയിട്ടുണ്ട്.

ഡിസംബർ 31 ന് ഉച്ചകഴിഞ്ഞു 3 മണിയ്ക്ക് ആരംഭിക്കുന്ന പുതുവത്സര ആഘോഷ പരിപാടികൾ ജനുവരി 1 പുലർച്ചെ 4 വരെ നീളും. 192 രാജ്യങ്ങൾ ഒരുമിക്കുന്ന പുതുവത്സരാഘോഷത്തിനാണ് അരങ്ങൊരുങ്ങുന്നതെന്നാണ് അധികൃതർ അറിയിക്കുന്നത്.

എന്തായാലും ദുബായ് എക്‌സ്‌പോ വേദിയിൽ ആഘോഷത്തിനുള്ള ഒരുക്കങ്ങൾ പൂർത്തിയായി. ഭക്ഷണശാലകൾ മുഴുവൻ സമയവും പ്രവർത്തിക്കും. പുതുവത്സര വിഭവങ്ങളൊരുക്കുകയും ചെയ്യും. ഇന്ത്യ പവിലിയനിലും പ്രത്യേക പരിപാടികളുണ്ടാകും.

മാത്രമല്ല ജൂബിലി പാർക്കിൽ 11.30 ന് തുടങ്ങുന്ന ഡിജെ മേളയിൽ ലോകത്തിലെ പ്രഗത്ഭ ഇലക്ട്രോണിക് സംഗീത വിദ്വാൻമാർ അണിനിരക്കുന്നു. ഇന്ത്യ, അറബ് രാജ്യങ്ങൾ, ഫിലിപ്പീൻസ് എന്നിവിടങ്ങളിൽ നിന്നുള്ള ഡിജെകൾ നടക്കുന്നുണ്ട്.