മലയാളസിനിമ പ്രേക്ഷകരുടെ പ്രിയ താരമാണ് ധർമ്മജൻ ബോൾഗാട്ടി. ടെലിവിഷൻ പരിപാടികളിലെ ഹാസ്യകഥാപാത്രങ്ങളിലൂടെയാണ് ധർമജൻ പ്രശസ്തനാവുന്നത്. തന്റെ ജീവിതത്തിലെ എല്ലാ വിശേഷങ്ങളും സോഷ്യൽമീഡിയയിലൂടെ പങ്കുവയ്ക്കാറുണ്ട്. ഇപ്പോഴിതാ താരം വീണ്ടും വിവാഹിതനായെന്ന വാർത്തയാണ് പുറത്തുവരുന്നത്. വധു മറ്റാരുമല്ല, സ്വന്തം ഭാര്യ തന്നെയാണ്!
വിവാഹവാർഷിക ദിനത്തിലാണ് മക്കളെ സാക്ഷിയാക്കി നടൻ ധർമജനും ഭാര്യയും വീണ്ടും വിവാഹിതരായത്. വിവാഹം നേരത്തെ രജിസ്റ്റര് ചെയ്യാതിരുന്നതിനാലാണ് താരം നിയമപ്രകാരം ഒരു ചടങ്ങായി നടത്തിയത്. മുമ്പ് ഒളിച്ചോടി ഒരു ക്ഷേത്രത്തില് വിവാഹം നടത്തിയെങ്കിലും നിയമപരമായി രജിസ്റ്റര് ചെയ്തിരുന്നില്ലെന്ന് താരം വ്യക്തമാക്കി. ഇന്ന് രാവിലെ 10.30 ഓടെ അടുത്ത ബന്ധുക്കളുടെ സാന്നിധ്യത്തിൽ ക്ഷേത്രത്തിൽ വച്ചാണ് ഭാര്യയെ രണ്ടാമതും വിവാഹം കഴിച്ചത്. ധർമജൻ ഭാര്യയെ താലികെട്ടി തുളസിമാല അണിയിക്കുന്ന വീഡിയോയും ചിത്രങ്ങളും സമൂഹമാദ്ധ്യമങ്ങളിൽ നിറയുന്നുണ്ട്. നിരവധി പേരാണ് ആശംസകളുമായി രംഗത്തെത്തിയത്.
വിവാഹ വാർഷിക ദിനത്തിൽ വീണ്ടും വിവാഹിതനാകുന്നുവെന്ന വിവരം ഇന്ന് രാവിലെ ഫെയ്സ്ബുക്കിലൂടെ താരം അറിയിച്ചിരുന്നു. ‘എന്റെ ഭാര്യ വീണ്ടും വിവാഹിതയാകുന്നു, വരൻ ഞാൻ തന്നെ, മുഹൂർത്തം 9.30 നും 10.30 നും ഇടയിൽ എല്ലാവരുടേയും അനുഗ്രഹം ഉണ്ടാകണം.’- എന്നാണ് ധർമജൻ കുറിച്ചത്. ഇതിനോടകം ധർമജന്റെ പോസ്റ്റും സമൂഹമാദ്ധ്യമങ്ങളിൽ വൈറലായിട്ടുണ്ട്.