ചന്ദ്രയാൻ-3 ഭൂമിയെ ചുറ്റിയുള്ള അവസാന ഭ്രമണപഥം ഉയർത്തൽ നീക്കം പൂർത്തിയാക്കി സ്ലിംഗ്ഷോട്ടിലൂടെ ചാന്ദ്ര യാത്ര ആരംഭിക്കാൻ ഒരുങ്ങുകയാണ്. ഇതിനിടെ പോളിഷ് ശാസ്ത്രജ്ഞരുടെ ഒരു സംഘം തങ്ങളുടെ ROTUZ (Panoptes-4) ടെലിസ്കോപ്പ് ഉപയോഗിച്ച് ബഹിരാകാശത്തിലൂടെ സഞ്ചരിക്കുന്ന ചന്ദ്രയാൻ പേടകത്തെ കണ്ടെത്തി. ടെലിസ്കോപ്പ് പ്രവർത്തിപ്പിക്കുന്ന കമ്പനിയായ സിബില്ല ടെക്‌നോളജീസ്, ബഹിരാകാശത്തിന്റെയും നക്ഷത്രങ്ങളുടെയും വിശാലതയ്‌ക്കിടയിൽ ചന്ദ്രയാൻ -3 ഒരു ചെറിയ പൊട്ട് പോലെ പോകുന്ന ഒരു വീഡിയോ ഇക്കഴിഞ്ഞ ചൊവ്വാഴ്ചയാണ് പങ്കിട്ടത്.
രാജ്യത്തിന്റെ അഭിമാനം വാനോളമുയർത്തിക്കൊണ്ട് രാജ്യത്തിന്റെ ചാന്ദ്ര പര്യവേഷണ ദൗത്യമായ ചന്ദ്രയാൻ 3, ശ്രീഹരിക്കോട്ടയിലെ രണ്ടാം വിക്ഷേപണത്തറയിൽനിന്നു ജൂലൈ 14 നാണ് വിക്ഷേപിച്ചത് .
ഒരു മാസത്തിനുശേഷം ചന്ദ്രന്റെ ദക്ഷിണധ്രുവത്തിനു സമീപം ചന്ദ്രയാൻ 3 സുരക്ഷിതമായി ലാൻഡ് ചെയ്യും. ദൗത്യം വിജയം കാണുമ്പോള്‍ ചന്ദ്രനിൽ സുരക്ഷിതമായി ഒരു പേടകം ലാൻഡ് ചെയുന്ന നാലാമത്തെ രാജ്യമായി ഇന്ത്യ ചരിത്രത്തിന്റെ ഭാഗമാകും .
ഭൂമിയുമായുള്ള ഭ്രമണപഥത്തിലെ ഏറ്റവും അടുത്ത ദൂരം 236 കിലോമീറ്ററും കൂടിയ ദൂരം 1,27,603 കിലോമീറ്ററുമായ ഭ്രമണപഥത്തിലാണ് പേടകമിപ്പോൾ. ഭൂമിയുടെ ഗുരുത്വാകർഷണം ഉപേക്ഷിച്ച് ചന്ദ്രനിലേക്ക് പോകുന്നതിനായി ചന്ദ്രയാൻ -3 ഓഗസ്റ്റ് 1 ന് അതിന്റെ ത്രസ്റ്ററുകൾ വിക്ഷേപിക്കും. ചന്ദ്രന്റെ ഗുരുത്വാകർഷണത്തിൽ പ്രവേശിച്ച ശേഷം, അത് ചന്ദ്രന്റെ ഭ്രമണപഥത്തിലേക്ക് നീങ്ങും, ഓഗസ്റ്റ് ആദ്യവാരത്തോടെ ചന്ദ്രനുചുറ്റും 5-6 സർക്കിളുകൾ പൂർത്തിയാക്കും. തുടർന്നുള്ള 10 ദിവസത്തിനുള്ളിൽ, ചന്ദ്രന്റെ ദക്ഷിണധ്രുവപ്രദേശത്തെ കൃത്യമായ ലാൻഡിംഗ് സ്പോട്ട് പേടകം തിരിച്ചറിയും.
We’re thrilled to see #Chandrayan3 (@isro) observed by @astro_agn at ROTUZ (Panoptes-4) telescope (J. Gil Institute of Astronomy University of Zielona Góra), operated by @sybilla_tech . Trajectory via @coastal8049 with STRF by @cgbassa and members of the @SatNOGS . Godspeed! pic.twitter.com/8ifW94lOJQ
— Sybilla Technologies (@sybilla_tech) July 25, 2023
ചന്ദ്രയാൻ-3 ഓഗസ്റ്റ് 23 ന് വൈകുന്നേരം 5:47 ചന്ദ്രോപരിതലത്തിൽ സോഫ്റ്റ് ലാൻഡിംഗ് നടത്താൻ ശ്രമിക്കും, എന്നാൽ ചന്ദ്രന്റെ ഉദയത്തെ അടിസ്ഥാനമാക്കി സമയം മാറിയേക്കാം. കാലതാമസം നേരിട്ടാൽ, ഐഎസ്ആർഒ സെപ്തംബറിൽ ലാൻഡിംഗ് പുനഃക്രമീകരിക്കും
