സിംബാബ്‌വെയുടെ ഇതിഹാസ താരം ബ്രണ്ടന്‍ ടെയ്‌ലര്‍ വിരമിക്കുന്നു

സിംബാബ്‌വെ വിക്കറ്റ് കീപ്പർ ബാറ്റ്സ്മാൻ ബ്രണ്ടൻ ടെയ്‌ലർ അന്താരാഷ്ട്ര ക്രിക്കറ്റിൽ നിന്നും വിരമിക്കുന്നു. അയർലൻഡിനെതിരെ നടക്കുന്ന ഏകദിന മത്സരത്തിനു ശേഷം കരിയർ അവസാനിപ്പിക്കുമെന്ന് താരം വ്യക്തമാക്കി.

‘വളരെ വിഷമത്തോടെ ഞാൻ ക്രിക്കറ്റിൽ നിന്നും വിരമിക്കുകയാണ്. സിംബാബ്‌വെ ടീമിനൊപ്പമുള്ള 17 വർഷങ്ങൾ ഞാൻ എന്നുമോർക്കും. ഇത്രയും കാലം ടീമിന് വേണ്ടി കളിക്കാൻ സാധിച്ചതിൽ ഞാൻ അഭിമാനിക്കുന്നു. ടീമിന് വേണ്ടി എപ്പോഴും മികച്ച പ്രകടനം പുറത്തെടുക്കാനാണ് ശ്രമിച്ചത്. എല്ലാവർക്കും നന്ദി’, ടെയ്‌ലർ പറഞ്ഞു.

2004ൽ ദേശീയ ജഴ്സിയണിഞ്ഞ താരം 204 ഏകദിന മത്സരങ്ങളിൽ നിന്നായി 6677 റൺസാണ് നേടിയിട്ടുള്ളത്. 934 റൺസാണ് ടി-20യിൽ താരത്തിൻ്റെ സമ്പാദ്യം. സൺറൈസേഴ്സ് ഹൈദരാബാദ് അടക്കം വിവിധ ടി-20 ലീഗുകളിലെ ടി-20 ടീമുകളിൽ കളിച്ചിട്ടുണ്ട്.