തിരുവനന്തപുരം: എസ് എഫ് ഐയെ പരസ്യമായി വിമർശിച്ച സിപിഐ നേതാവിന് മറുപടിയുമായി എ കെ ബാലൻ. എസ് എഫ് ഐ വഴിയിൽ കെട്ടിത്തൂക്കിയ ചെണ്ടയല്ലെന്നും തിരുത്താൻ കഴിവുള്ള സംഘടനയാണതെന്നും അദ്ദേഹം മാദ്ധ്യമങ്ങളോട് പറഞ്ഞു. ഭരണാധികാരികളുടെ തണലിൽ വളർന്ന സംഘടനയല്ല. ഇന്നത്തെ സിപിഎം നേതാക്കളെല്ലാം വളർന്നു വന്ന സംഘടനയാണത്. പേപ്പട്ടിയാക്കി തല്ലിക്കൊല്ലാൻ മുന്നണിക്ക് പുറത്തും അകത്തുമുള്ള ആരെയും അനുവദിക്കില്ലെന്നും അദ്ദേഹം കൂട്ടിച്ചേർത്തു.
ഇന്നലെയാണ് സിപിഐ സംസ്ഥാന സെക്രട്ടറി എസ് എഫ് ഐക്കെതിരെ രൂക്ഷ വിമർശനമുയർത്തിയത്. കാര്യവട്ടം കൊയിലാണ്ടി വിഷയങ്ങൾ പരാമർശിച്ചായിരുന്നു വിമർശനം. എസ് എഫ് ഐ പുറത്തെടുക്കുന്നത് പ്രാകൃത രാഷ്ട്രീയമാണെന്നും സംഘടനയെ ചുമക്കുന്നത് ഇടതുപക്ഷത്തിന് ബാധ്യതയാകുമെന്നുമായിരുന്നു. അദ്ദേഹത്തിന്റെ വിമർശനം. ക്യാമ്പസിലെ അക്രമ സംഭവങ്ങളുടെ പശ്ചാത്തലത്തിൽ എസ് എഫ് ഐ നിരന്തരം പ്രതിസ്ഥാനത്ത് വരുന്നുണ്ട്. നിരവധി കേസുകളിൽ എസ് എഫ് ഐ പ്രവർത്തകർ പ്രതികളായതോടെ സംഘടന പ്രതിരോധത്തിലാണ്.