അന്യഗ്രഹജീവികൾ യാഥാർഥ്യം ??124 പ്രകാശവർഷം അകലെയുള്ള എക്സോപ്ലാനറ്റിൽ ജീവജാലങ്ങൾ ഉൽപ്പാദിപ്പിക്കുന്ന വാതക സാന്നിധ്യം തിരിച്ചറിഞ്ഞ് ജെയിംസ് വെബ് ബഹിരാകാശ ദൂരദർശിനി

ഭൂമിയിൽ നിന്ന് 124 പ്രകാശവർഷം അകലെ സ്ഥിതി ചെയ്യുന്ന K2-18b ഡൈമെഥൈൽ സൾഫൈഡ് (DMS) വാതകം കണ്ടെത്തിയതായി റിപ്പോർട്ട്. മനുഷ്യവാസം ഭാവിയിൽ സാധ്യമായേക്കാൻ സാധ്യതയുള്ള, ഗ്രഹങ്ങളുടെ വിഭാഗമായ എക്സോപ്ലാനറ്റ് വിഭാഗത്തിൽ വരുന്ന ഗ്രഹമാണ് K2-18b . ജെയിംസ് വെബ് ബഹിരാകാശ ദൂരദർശിനിയിലൂടെയാണ് ഈ സുപ്രധാന കണ്ടെത്തലിലേക്ക് ശാസ്ത്രലോകമെത്തിയത്.
ഡൈമെഥൈൽ സൾഫൈഡ് വാതകം ജീവൻ്റെ സാധ്യതയുടെ ശക്തമായ സൂചകമായി കണക്കാക്കപ്പെടുന്നു. ജീവജാലങ്ങളുടെ ജീവൽ പ്രവർത്തനങ്ങളുടെ ഭാഗമായി ഉത്പാദിപ്പിക്കപ്പെടുന്ന വാതകമാണിത്. അതിനാൽ തന്നെ ഈ ഗ്രഹത്തിലും ജീവന്റെ സാന്നിധ്യം ഉണ്ടായേക്കാം എന്നാണ് നിഗമനം. അങ്ങനെയെങ്കിൽ കഥകളിലും സിനിമകളിലും മാത്രം നമ്മൾ കാണുകയും കേൾക്കുകയും ചെയ്ത അന്യഗ്രഹ ജീവികളും ഇനി യാഥാർഥ്യമാണ് എന്ന് ചിന്തിക്കേണ്ടി വരും.

K2-18b എക്സോപ്ലാനറ്റിനെ 2015 ൽ കെപ്ലർ ബഹിരാകാശ ദൂരദർശിനി ഉപയോഗിച്ചാണ് കണ്ടെത്തിയത്. ലിയോ നക്ഷത്രസമൂഹത്തിലെ ഒരു എം കുള്ളൻ നക്ഷത്രത്തെയാണ് K2-18b ഭ്രമണം ചെയ്യുന്നത്.ഹൈഡ്രജൻ സമ്പുഷ്ടമായ അന്തരീക്ഷവും ജലസമുദ്രത്താൽ മൂടപ്പെട്ട പ്രതലവും ഉണ്ടാകാൻ സാധ്യതയുള്ള ഗ്രഹം കൂടിയാണിത്.