പോലീസിന്റെ നോട്ടീസിൽ പതറാതെ മുന്നോട്ട്; അനന്തപുരി ഹിന്ദുമഹാ സമ്മേളനം മൂന്നാം ദിവസത്തിലേക്ക്; മുൻ കേരളാപോലീസ് മേധാവി ടി പി സെൻകുമാറടക്കം ഇന്നും നിരവധി പ്രമുഖർ സംസാരിക്കും

തിരുവനന്തപുരം: നാരീശക്തി രാഷ്ട്ര നവനിർമ്മാണത്തിന് എന്ന മുദ്രാവാക്യം ഉയർത്തിപ്പിച്ചിച്ച് അനന്തപുരി ഹിന്ദു മഹാസമ്മേളനം മൂന്നാം ദിവസത്തിലേക്ക്. രണ്ടാം ദിവസമായ ഇന്നലെ സമ്മേളനവേദിയായ തിരുവനന്തപുരം പുത്തരിക്കണ്ടം മൈതാനിയിൽ വിവിധ ഇസ്‌ലാമിക സംഘടനകൾക്ക് ഈദ് ഗാഹ് സംഘടിപ്പിക്കാനുള്ള അനുമതിയും സൗകര്യവും സമ്മേളനത്തിന്റെ സംഘാടകരായ ഹിന്ദു ധർമ്മ പരിഷത് നൽകിയിരുന്നു. എന്നാൽ തൊട്ടുപിന്നാലെ സമ്മേളനത്തിൽ മതവിദ്വേഷ പ്രസംഗങ്ങൾ ഉണ്ടാകരുത് എന്ന് മുന്നറിയിപ്പ് നൽകിക്കൊണ്ട് തിരുവനന്തപുരം ഫോർട്ട് പോലീസിന്റെ നോട്ടീസ് സംഘാടകർക്ക് ലഭിച്ചത് ചർച്ചാ വിഷയമായി. അധികാരകേന്ദ്രങ്ങളിലെ സ്ത്രീ സാന്നിദ്ധ്യവും, ക്ഷേത്രങ്ങളും ഭക്തജനങ്ങളും നേരിടുന്ന വെല്ലുവിളികളും, മാദ്ധ്യമങ്ങളിലെ ദേശവിരുദ്ധരും ഒക്കെ ഇന്നലത്തെ സെമിനാറുകളിൽ ചർച്ചാവിഷയമായി. വൈകുന്നേരത്തെ പൊതുസമ്മേളനത്തെ അഭിസംബോധന ചെയ്‌ത്‌ ഹിന്ദു ഐക്യവേദി സംസ്ഥാന പ്രസിഡന്റ് കെ പി ശശികലയുടെ പ്രസംഗം ശ്രദ്ധേയമായി. ഗോവ ഗവർണർ പി എസ് ശ്രീധരൻപിള്ള മുഖ്യാതിഥിയായിരുന്നു.

മൂന്നാം ദിവസമായ ഇന്ന് വനിതാ സംരംഭകർ, ദേശീയ വിദ്യാഭ്യാസവും അവസരങ്ങളും, സ്കൂൾ തലത്തിൽ ദേശീയ വിദ്യാഭ്യാസ നയം തുടങ്ങിയ വിഷയങ്ങളാണ് സെമിനാറുകൾ. ഛായാ നഞ്ചപ്പ, സരിക കുൽക്കർണ്ണി പതക്, അഡ്വ വിവേക് ഗണേഷ്, ഡോ ശ്രീകലാദേവി, ഡോ വിജയനമ്പൂതിരി, അഡ്വ. കെ ജി മുരളീധരൻ ഉണ്ണിത്താൻ, ഡോ മധുസൂദനൻ പിള്ള, ഡോ ഉണ്ണികൃഷ്ണൻ നമ്പൂതിരി, കെ വി രാജേന്ദ്രൻ തുടങ്ങിയവർ സെമിനാറുകൾ നയിക്കും വൈകുന്നേരം നടക്കുന്ന പൊതുസമ്മേളനത്തിൽ ഡോ ബിജു രമേശ് അദ്ധ്യക്ഷനായിരിക്കും. മുൻ കേരളാ പോലീസ് മേധാവി ഡോ ടി പി സെൻകുമാർ മുഖ്യപ്രഭാഷണം നടത്തും. പതിനൊന്നാമത് ഹിന്ദു മഹാസമ്മേളനം തത്വമയി ലോകമെമ്പാടുമുള്ള പ്രേക്ഷകരിലേക്ക് തത്സമയം എത്തിക്കുന്നു. തത്സമയക്കാഴ്ചകൾക്കായി ഈ ലിങ്കിൽ ക്ലിക്ക് ചെയ്യുക