കാട്ടാക്കടയിൽ മൂന്നംഗ കുടുംബത്തെ വീടിനുള്ളിൽ പൂട്ടിയിട്ട് ചുട്ടുകൊല്ലാൻ ശ്രമം!! അയൽവാസി പിടിയിൽ ; പിൻവാതിൽ വഴി ഇറങ്ങിയോടി കുടുംബം രക്ഷപ്പെട്ടു

തിരുവനന്തപുരം : തലസ്ഥാനത്ത് മൂന്നംഗ കുടുംബത്തെ വീട്ടിനുള്ളിലിട്ട് തീ കൊളുത്തി കൊല്ലാൻ ശ്രമം. കാട്ടാക്കട അമ്പലത്തുംകാലയിലാണ് കുടുംബത്തിന് നേരെ ആക്രമണമുണ്ടായത്. ഇന്ന് രാവിലെ പത്തുമണിയോടെയായിരുന്നു സംഭവം. സംഭവത്തിൽ അയല്‍വാസിയും വിമുക്തഭടനുമായ അജയകുമാറിനെ പൊലീസ് പിടികൂടി.

വീട്ടമ്മയും മകളും കൊച്ചുമകനും മാത്രമാണ് വീട്ടിലുണ്ടായിരുന്നത്. പെട്രോളുമായി വീട്ടിലെത്തിയ പ്രതി, മുൻവാതിൽ പുറത്തുനിന്ന് പൂട്ടിയശേഷം ജനലിനുള്ളിലൂടെ പെട്രോൾ ഒഴിച്ച് തീയിടുകയായിരുന്നു. മുറിക്കുള്ളില്‍ തീപടരുന്നത് കണ്ടതോടെ പ്രാണരക്ഷാർത്ഥം കുടുംബം പിന്‍വാതില്‍ തുറന്ന് പുറത്തേക്ക് ഓടുകയായിരുന്നു. സംഭവത്തില്‍ ആര്‍ക്കും പരുക്കേറ്റിട്ടില്ല. എന്നാൽ വീട്ടിലുണ്ടായിരുന്ന വസ്ത്രങ്ങളും ഫര്‍ണ്ണിച്ചറുകളും കത്തിനശിച്ചു.

മുഖംമൂടി ധരിച്ചെത്തിയാണ് പ്രതി കൃത്യം നടത്തിയെന്നാണ് വിവരം. സ്വത്ത് തര്‍ക്കമാണ് ആക്രമണത്തിന് കാരണമെന്നും പ്രതി നേരത്തെ പീഡനക്കേസില്‍ ഉള്‍പ്പെട്ടയാളാണെന്നും പൊലീസ് വൃത്തങ്ങൾ വ്യക്തമാക്കി.