ആലപ്പുഴയിൽ കനത്തമഴയെ തുടർന്ന് വീട് തകർന്നു വീണു; അപകടത്തിൽ അമ്മക്കും മകൾക്കും പരിക്ക്

ആലപ്പുഴ: മാന്നാറിൽ കഴിഞ്ഞ ദിവസമുണ്ടായ ശക്തമായ മഴയിലും കാറ്റിലും വീടിന്റെ മേൽക്കൂര തകർന്ന് വീണ് അമ്മക്കും മകൾക്കും പരിക്കേറ്റു. മാന്നാർ പാവുക്കര മൂന്നാം വാർഡിൽ പന്തളാറ്റിൽ ചിറയിൽ മണലിൽ തെക്കേതിൽപരേതനായ രാജപ്പൻ ആചാരിയുടെ വീടിൻ്റ മേൽക്കൂരയാണ് പൂർണ്ണമായും തകർന്നു വീണത്. രാജപ്പൻ ആചാരിയുടെ മകൾ രാഖി (42), രാഖിയുടെ മകൾ ദിയ അനിൽ (13 ) എന്നിവർക്കാണ് പരിക്കേറ്റത്.

കഴിഞ്ഞദിവസം രാത്രി പതിനൊന്നു മണിയോടെയായിരുന്നു അപകടം നടന്നത്. അമ്മയും മകളും ഉറക്കമായിരുന്നതിനാൽ ഓടിമാറാൻ സാധിച്ചില്ല. രാഖിയുടെ തോളെല്ലിന് പൊട്ടൽ സംഭവിക്കുകയും മകൾ ദിയയുടെ കാലിനു മുറിവേൽക്കുകയും ചെയ്തു. വാർഡ് മെമ്പറും നാട്ടുകാരും ചേർന്ന് പരിക്കേറ്റ ഇരുവരെയും തിരുവല്ല ഗവ.ആശുപത്രിയിൽ പ്രവേശിപ്പിച്ചു.

ഏഴുമാസം മുമ്പ് വെള്ളപ്പൊക്കത്തെ തുടർന്ന് ദുരിതാശ്വാസ ക്യാമ്പിലായിരുന്നു കുടുംബം താമസിച്ചിരുന്നത്. അവിടം സന്ദർശിക്കാൻ എത്തിയ ആലപ്പുഴ ജില്ലാ കളക്ടർ കുടുംബത്തിന് വീട് നിർമ്മിച്ച് നൽകുന്നതിന് ആവശ്യമായ നടപടികൾ കൈക്കൊള്ളുമെന്ന് അറിയിച്ചിരുന്നു. എന്നാൽ വീട് തകർന്നതോടെ തലചായ്ക്കാൻ ഇടമില്ലാത്ത അവസ്ഥയാണ്. നിലവിൽ അമ്മയ്ക്കും മകൾക്കും വാർഡ് മെമ്പർ സലീന നൗഷാദ് താൽക്കാലികമായി താമസ സൗകര്യം ഏർപ്പാടാക്കി നൽകി.