നോക്കുകൂലി ഭരണഘടനാ വിരുദ്ധം; ചുമട്ടുതൊഴിലാളികളെ യന്ത്രങ്ങൾ ഉപയോഗിക്കാൻ പ്രാപ്തമാക്കണം; വിഷയത്തിൽ നിർണായക നിർദേശങ്ങളുമായി ഹൈക്കോടതി

കൊച്ചി: നോക്കുകൂലി ആവശ്യപ്പെടുന്നവർക്കെതിരേ കർശന നടപടി സ്വീകരിക്കാനായി ചുമട്ടുതൊഴിലാളി നിയമത്തിൽ കൊണ്ടുവരാൻ ഉദ്ദേശിക്കുന്ന ഭേദഗതി എത്രയുംവേഗം നടപ്പിലാക്കണമെന്ന് (High Court) ഹൈക്കോടതി. നോക്കുകൂലി ഭരണഘടനാ വിരുദ്ധമാണെന്ന് ഹൈക്കോടതി ചൂണ്ടിക്കാട്ടി. ട്രേഡ് യൂണിയനുകൾ, ചുമട്ടു തൊഴിലാളികൾ തുടങ്ങി ആരും നോക്കുകൂലി ആവശ്യപ്പെടുന്നത് കുറ്റകരമാണെന്നും പരാതി ലഭിച്ചാൽ പൊലീസ് കേസെടുക്കണമെന്നും ഹൈക്കോടതി വ്യക്തമാക്കി.

നോക്കുകൂലി നിയമവിരുദ്ധവും ഭരണഘടനാവിരുദ്ധവുമാണെന്ന നിലപാട് ആവർത്തിച്ചുകൊണ്ടാണ് ജസ്റ്റിസ് ദേവൻ രാമചന്ദ്രൻ ഈ നിർദേശങ്ങൾ നൽകിയിരിക്കുന്നത്.കേസില്‍ ഐപിസി 383, ഐപിസി 503 വകുപ്പുകള്‍ ചുമത്താമെന്ന് ഹൈക്കോടതി അറിയിച്ചു.നോക്കുകൂലി ക്രിമിനല്‍ കുറ്റമായി കണക്കാക്കണമെന്ന് ഹൈക്കോടതി നേരത്തെ തന്നെ ചൂണ്ടിക്കാട്ടിയിരുന്നു. നോക്കുകൂലി ആവശ്യപ്പെടുന്നത് ഭീഷണിപ്പെടുത്തി പണം തട്ടുന്നതിന് സമാനമാണമെന്നും നോക്കുകൂലി ആവശ്യപ്പെടുന്നവര്‍ക്കെതിരെ പൊലീസ് കര്‍ശന നടപടി സ്വീകരിക്കണമെന്നുമായിരുന്നു കോടതി നിര്‍ദേശം.