അവിഹിതബന്ധം ആരോപിച്ച് ബംഗാളിൽ യുവാവിനും യുവതിക്കും ക്രൂരമർദനം; അടിച്ചത് തൃണമൂൽ നേതാവെന്ന് ആക്ഷേപം; മമതാ ബാനര്‍ജി ഭരണത്തിന്റെ വികൃതമുഖം വെളിപ്പെട്ടുവെന്ന് തുറന്നടിച്ച് ബിജെപി

കൊല്‍ക്കത്ത : അവിഹിതബന്ധം ആരോപിച്ച് യുവാവിനും യുവതിക്കും ക്രൂരമര്‍ദനം. പശ്ചിമ ബംഗാളിലെ ഉത്തര്‍ ദിനാജ്പുര്‍ ജില്ലയിലെ ചോപ്രയിൽനടന്ന സംഭവത്തിന്റെ വീഡിയോ ദൃശ്യങ്ങൾ വ്യാപകമായി പ്രചരിച്ചതോടെയാണ് ക്രൂര കൃത്യം പുറം ലോകമറിഞ്ഞത്. യുവതിയെയും യുവാവിനെയും മുളവടി ഉപയോഗിച്ച് ഒരു പുരുഷന്‍ ക്രൂരമായി മര്‍ദിക്കുന്നതാണ് വീഡിയോയിലുള്ളത്. മര്‍ദിച്ചത് തൃണമൂല്‍ കോണ്‍ഗ്രസിന്റെ പ്രാദേശിക നേതാവാണെന്ന് ബിജെപി ആരോപിച്ചു. സംഭവം വിവാദമായതോടെ പശ്ചിമ ബംഗാൾ പോലീസ് കേസെടുത്തു എന്നാണ് ലഭിക്കുന്ന വിവരം. കേസിൽ നിലവിൽ അറസ്റ്റുണ്ടായിട്ടില്ല എന്നാണ് റിപ്പോർട്ട്.

സംഭവത്തിന്റെ വീഡിയോ സാമൂഹ മാദ്ധ്യമത്തിലൂടെയാണ് പോലീസ് കണ്ടതെന്നും പരിശോധിച്ചതിന് ശേഷം കേസ് രജിസ്റ്റര്‍ ചെയ്തുവെന്നും ഇസ്‌ലാപുര്‍ എസ്.പി. ജോബി തോമസ് കെ. വാര്‍ത്താ ഏജന്‍സിയോട് പ്രതികരിച്ചു. കുറ്റക്കാരനെ അറസ്റ്റ് ചെയ്യാനുള്ള തിരച്ചില്‍ ആരംഭിച്ചതായും സംഭവത്തിന് പിന്നിലെ കാരണമെന്തെന്ന് അന്വേഷിക്കുമെന്നും അദ്ദേഹം കൂട്ടിച്ചേര്‍ത്തു.

പശ്ചിമ ബംഗാളിലെ മമതാ ബാനര്‍ജിയുടെ ഭരണത്തിന്റെ വികൃതമുഖമാണ് ഇതെന്ന് ബിജെപി. വക്താവ് അമിത് മാളവ്യ എക്‌സില്‍ വിമര്‍ശിച്ചു. യുവതിയെയും യുവാവിനെയും മര്‍ദിക്കുന്നയാള്‍ ചോപ്രയിലെ എംഎല്‍എ ഹമിദുര്‍ റഹ്മാന്റെ അടുത്ത അനുയായി ആണെന്നും മാളവ്യ ആരോപിച്ചു.