ജയ്‌ഘോഷിന്റെ നിയമനം: കൈരളി ടിവിയുടെ ആരോപണം നിഷേധിച്ച് ടി.പി.സെൻകുമാർ.

തിരുവനന്തപുരം: ജയ്‌ഘോഷിന്റെ നിയമനം താൻ ആണ് നടത്തിയത് എന്ന കൈരളിയുടെ ആരോപണം നിഷേധിച്ച് മുൻ ഡിജിപി ടി.പി.സെൻകുമാർ.
സെൻകുമാറാണ് ഉത്തരവിൽ ഒപ്പിട്ടിരിക്കുന്നതെങ്കിലും നിയമന നടപടികളുമായി ബന്ധപ്പെട്ട ചർച്ചകൾ നടന്നത് ഡിജിപി ലോക്‌നാഥ് ബെഹ്‌റയുടെ കാലത്താണ്. തുടർന്ന് ജയഘോഷിന്റെ നിയമന കാലാവധി മൂന്ന് തവണ നീട്ടി നൽകിയതും നിലവിലെ ഡിജിപി ലോക്‌നാഥ് ബെഹ്‌റയാണ്.

2016-ലെ സർക്കാർ ഉത്തരവ് ജിഒ (ആർടി) നം. 3369/2016/ഹോം 08-11-2016) പ്രകാരമാണ് യുഎഇ കോൺസൽ ജനറലിന് എക്സ് കാറ്റഗറിയിൽ പേഴ്സണൽ സെക്യൂരിറ്റി അനുവദിച്ചത്. യുഎഇ കോൺസുൽ ജനറലിന്റെ കത്ത് പ്രകാരം 2016 ഒക്ടോബർ 21ന് ചേർന്ന സെക്യൂരിറ്റി റിവ്യൂ കമ്മിറ്റി തീരുമാന പ്രകാരമാണ് സെക്യൂരിറ്റി നൽകിയത്. യുഎഇ കോൺസുലേറ്റ് ജനറലിന്റെ ഗൺമാനായി ജയഘോഷിന്റെ നിയമന കാലാവധി മൂന്ന് തവണ നീട്ടി നൽകിയതും ഡിജിപി ലോക്‌നാഥ് ബെഹ്‌റ തന്നെ ആണ്.
ഡിജിപി ലോക്‌നാഥ് ബെഹ്‌റ നേരിട്ടാണ് കാലാവധി പുതുക്കി ഉത്തരവിറക്കിയത്. 2017 ലാണ് ജയഘോഷ് യുഎഇ കോൺസുലേറ്റ് ജനറലിന്റെ ഗൺമാനാണ് നിയമിക്കപ്പെടുന്നത്. തുടർന്നുള്ള 2018, 2019, 2020 വർഷങ്ങളിൽ കാലാവധി പുതുക്കി നൽകി. 2020 ജനുവരി എട്ടിനാണ് അവസാനമായി കാലാവധി പുതുക്കി ഉത്തരവിറക്കിയത്. ഗൺമാനായി ജയഘോഷിന്റെ കാലാവധി നീട്ടണമെന്ന് ആവശ്യപ്പെട്ട് കോൺസുലേറ്റ് ജനറൽ കത്ത് നൽകിയതായും ജയഘോഷിന്റെ നിയമന ഉത്തരവിൽ വ്യക്തമാക്കുന്നു.